Zbulohet letra e fundit e Epstein para vetëvrasjes në burg, dalin disa detaje

Një raport i ri nga mediat amerikane ka rikthyer në vëmendje vdekjen misterioze të financierit Jeffrey Epstein, duke zbuluar se ai dyshohet se kishte lënë një shënim vetëvrasjeje pak para se të gjendej i vdekur në burg në vitin 2019, transmeton Gazeta Metro.

Sipas raportimit të New York Times, letra e supozuar është shkruar në një fletë të verdhë ligjore dhe është fshehur brenda një libri në qelinë e tij në Qendrën Korrektuese Metropolitan në New York.

Shënimi thuhet se është gjetur nga ish-shoku i qelisë së Epstein, Nicholas Tartaglione, një ish-polic i dënuar për katër vrasje.

Në përmbajtjen e letrës, Epstein thuhet se shpallte pafajësinë e tij dhe shprehte zhgënjim ndaj hetimeve që po zhvilloheshin ndaj tij.

“Çfarë doni të bëj, të shpërthej në lot?” dhe “Koha për të thënë lamtumirë”, janë disa nga frazat që raportohen se ndodheshin në letër.

Sipas burimeve, letra u verifikua si e shkruar nga Epstein brenda një viti, por mbetet ende e vulosur me urdhër gjykate dhe nuk është bërë publike.

Raportohet se dokumenti ndodhet në një gjykatë federale në White Plains, ku u dorëzua si pjesë e procedurave gjyqësore që lidhen me Tartaglione.

Ndërkohë, Departamenti Amerikan i Drejtësisë ka deklaruar se hetuesit e tyre nuk e kishin parë kurrë këtë letër, ndërsa ajo nuk figuron as në dosjet e publikuara së fundmi për rastin Epstein.

Vdekja e Epstein vazhdon të mbetet një nga rastet më të komentuara në SHBA, duke nxitur teori të shumta konspirative, sidomos pas raportimeve për dështime serioze të sigurisë natën kur ai u vetëvra, përfshirë rojet që kishin fjetur dhe kamerat jashtë funksionit./gazetametro.net