Vetëvendosje me aksion simbolik në Prizren

Partia më e madhe opozitare Vetëvendosje ka realizuar një aksion simbolik pranë burgut të Prizrenit, aty ku siç thonë ata padrejtësisht po mbahet tash e 67 ditë Astrit Dehari.

Duke shpalosur parullën “Lironi të burgosurit politik” dhe me brohoritje, aktivistët kërkuan lirimin e Astritit nga burgu, sikurse edhe të Atdheut e Egzonit që vuajnë burgun në Lipjan e Pejë.

Liri u kërkua edhe për Adean, Frashërin e Petritin, që po mbahen në arrest shtëpiak, raporton gazetametro.net

Anëtari i Kryesisë, Xhelal Sveçla, tha se pushteti kriminal i klanit “Pronto” me montime e pa asnjë provë të vetme po i  privon nga liria gjashtë aktivistë të Lëvizjes Vetëvendosje vetëm pse janë aktivistë të saj.

“Këtu, para meje ndodhet Astrit Dehari, një aktivist shembullor nga një familje veprimtarësh , një student i shkëlqyer në Fakultetin e Mjekësisë, një shok e familjar i dashur, një shembull për çdo të ri në Kosovë’’, tha Sveçla në fjalën e tij.

Kurse, Kryetari i Qendrës së Prizrenit, Artan Abrashi, duke bërë thirrje për lirimin e aktivistit Astrit Dehari, deklaroi se Astriti nuk është vetëm, dhe se ata do të vazhdojnë të jenë bashkë në përpjekjen për të çliruar shtetin nga kapësit dhe për të ndërtuar një shtet të së drejtës, ku askush nuk është mbi ligjin./gazetametro.net