‘Ultimatum’ nga Ambasada Gjermane: Formoni institucionet, Kosova s’ka më kohë për bllokada politike

Ambasada e Gjermanisë në Prishtinë bëri thirrje që procesi i krijimit të institucioneve të reja të përfundojë sa më parë, duke nënvizuar se vendi ka nevojë për stabilitet politik dhe funksionim të plotë institucional, transmeton Gazeta Metro.

Në një reagim publik, misioni diplomatik gjerman ka shprehur pritjen që procesi të përmbyllet pa zvarritje, në mënyrë që institucionet e reja të mund ta ushtrojnë mandatin e tyre të plotë.

“Kosova nuk ka kohë për të humbur. Shpresojmë që institucionet e reja të formohen në kohën e duhur dhe për një mandat të plotë”, thuhet në reagim.

Sa i përket zhvillimeve politike dhe kontakteve ndërmjet Lëvizjes Vetëvendosje dhe Lidhjes Demokratike të Kosovës, Ambasada e Gjermanisë nuk ka dhënë komente, duke shmangur përfshirjen në procesin e negociatave.

Megjithatë, ajo ka ritheksuar se mbetet thelbësore që vendi të mos humbasë ritmin në avancimin e objektivave që lidhen me integrimin evropian dhe zbatimin e reformave të nevojshme./gazetametro.net