Thaçi i dorëzohet presionit ndërkombëtar: Specialja nuk shfuqizohet

E plotësuar 15:21

Liderët e vendit janë pajtuar që të mos ketë shfuqizim të Gjykatës Speciales. Kështu ka deklaruar për herë të parë sot Presidenti Hashim Thaçi, shkruan Gazeta Metro.

---

Pas një kohe të gjatë të ushtrimit të presionit nga Ambasada e Amerikës dhe ajo e Britanisë së Madhe, Thaçi duket se ka ndryshuar mendimin e shprehur më parë lidhur me nismën e deptutetëve për shfuqizimin  e ligjit që themeloi dhomate e specializuara.

Të njejtën qasje ka shfaqur edhe kryeministri Ramush Haradinaj në një intervistë për DW, ku u shpreh se nisma për shfuqizimin do të rezultojë pa sukses.

“Gjykata Speciale nuk mund të shfuqizohet dhe nuk do të shfuqizohet. Ky është qëndrim i Kosovës i prezantuar nga Presidenti i vendit”, ka thënë Thaçi në një konferencë që është duke e mbajtur me gazetarë në këto momente, shkruan Gazeta Metro.

Ai ka thënë që Kosova nuk rrezikohet nga bashkëpunimi me drejtësinë ndërkombëtare.

---

15: 08 – Presidenti Thaçi nuk ia uron Xhavit Halitit ballafaqimin me Gjykatën Speciale

Nënkryetari i Kuvendit të Kosovës, Xhavit Haliti, ditë më parë kishte thënë se është kundër zhbërjes së Gjykatës Speciale dhe kishte shprehur dëshirë që të përballej me këtë gjykatë.

---

Por, presidenti Hashim Thaçi tha se këtë gjë nuk ia uron ish-bashkëpartiakut të tij, shkruan gazetametro.net

‘Unë e njoh zotin Haliti dhe gjithmonë jam lutur t’i plotësohen dëshirat. Por, këtë herë, nuk uroj t’i plotësohet kjo dëshirë’, ka thënë Presidenti Thaçi.

Ndërkohë i pari i vendit u pyet për qëndrimin e tij për zhbërjen e Gjykatës Speciale pas kundërshtimit të ndërkombëtarëve, por ky i fundit tha se ka qenë i qartë gjithmonë.

Thaçi kujtoi kohën kur ishte kryeministër i Kosovës, duke qartësuar se pse kishte pranuar të negociojë për krijimin e Speciales, duke thënë se ‘nuk kishim asgjë për të fshehur’, mirëpo sipas tij qasja e ndërkombëtarëve ka qenë selektive pasi akoma nuk është vepruar asgjë për gjithë masakrat që Serbia i ka kryer në Kosovë.

Ai e ka quajtur si ‘fantastiko-shkencor’ raportin e Dick Martyt, mbi pretendimet e të cilit edhe është nisur krijimi i Gjykatës Speciale. ‘Krijimi i Gjykatës Speciale është imponuar’, ka thënë i pari i vendit./gazetametro.net