Thaçi e Mustafa fajtorë pse po vjen treni në Kosovë

Kështu ka thënë Lëvizja Vetëvendosje përmes një reagimi dërguar mediave, ndërsa ka shtuar se ky tren që po qarkullon për herë të parë në relacionin Beograd-Mitrovicë që nga viti 1999, është përplot me motive të trashëgimisë kulturore e fetare serbe në Kosovë dhe me thënie që konsiderojnë Kosovën si pjesë të Serbisë.

Dhe kjo, sipas Vetëvendosjes, është qartas mesazhi i Serbisë që e do Kosovën si në vitin 1999.

“E kundruall gjithë kësaj, institucionet tona që detyroheshin nga Lista Srpska që të mbulonin muralet me simbole kombëtare në Kuvendin e Kosovës, kanë zgjedhur të mos veprojnë dhe të viktimizohen. Përballë këtij projekti famëkeq, negociatorët deklarojnë se treni është ilegal, se nuk janë marrë vesh për të në negociata, dhe kërkojnë që ai të ndalet nga Bashkimi Evropian. Ndonëse, në vazhdimësi të njëjtit negociatorë janë deklaruar për suksese të njëpasnjëshme të Kosovës në procesin negociator me Serbinë”, thotë më tej Vetëvendosje.

Ky subjekt politik thotë se Qeveria e Kosovës është vënë në shërbim të Serbisë.

“Nënshtrimi i vazhdueshëm ndaj Serbisë përmes negociatave me të, dhe nënshtimi ndaj degëzimit të saj në Kosovë, Listës Srpska, është garancë edhe për projekte të tjera që do ta minimizojnë shtetësinë e Kosovës. Prandaj, që të ruhet sovraniteti i Republikës së Kosovës duhet që të mos lejohet Serbia brenda saj. Dhe që të ndalet Serbia, është e domosdoshme që të ndërpritet procesi negociator pa parime e pa kushte më të, gjë të cilën nuk e bën dot qeveria aktuale e Kosovës, e cila funksionon pa asnjë parim dhe e kushtëzuar nga shteti serb”, ka përfunduar reagimi i Vetëvendosjes.

Gjatë ditës së sotme është nisur nga Beogradi treni i linjës Beograd – Mitrovicë e Veriut, tren i cili nga institucionet e Kosovës është cilësuar si “ilegal”, mirëpo ende nuk janë ndërmarr masa për të ndaluar kalimin e tij në Kosovë. Treni pritet të arrijë në Mitrovicë pas orës 19:30.