Thaci dhe Mustafa e ndalën trenin me tyta të pushkëve

Kryeministri serb, Aleksandar Vucic, pas provokimit të tensionimit të situatës në veri të Kosovës, me nisjen e trenit me simbole nacionaliste nga Beogradi për në Mitrovicë, tani po mundohet të marrë rolin e politikanit që evitoi gjakderdhjen. Ndërsa për homologun e tij kosovar, Isa Mustafa dhe presidentin Hashim Thaçi, po thotë se ndalën një tren me udhëtarë përmes tytave të pushkëve të gjata.

Këto deklarata ai i ka bërë në një intervistë në TV Pink, ku ka folur për zhvillimet e së shtunës me trenin rus që tentoi të hynte në Kosovë, përcjell gazetametro.net.

Ai ka thënë se veprimi i djeshëm i institucioneve të Prishtinës ishte në kundërshtim me marrëveshjet e Brukselit.

“Ndalimi i trenit është për në kundërshtim me marrëveshjet në Bruksel dhe pajtimin e NATO’së në Kosovë. Hashim Thaci dhe Isa Mustafa e ndalën trenin me tyta të gjata pushke, dhe jo me lejen apo pajtimin e Bashkimit Europian”.

“Për çdo lëvizje të armatosur të njësive shqiptare në Veri, duhet të merret pajtimi i NATO’së dhe serbëve lokal. Dhe kjo nuk ka ndohur”.

Vucic ka thënë se ai ka dhënë urdhër që treni të mos hyjë në Kosovë, dhe e gjithë kjo sipas tij, që të mos shkaktohej gjakderdhje.

“Jemi detyruar që ta ndalim trenin që të mos shkaktojmë gjakderdhje. Nuk e di pse dikujt i pengojnë tri ngjyrat serbe dhe ikonat tona. Treni ishte dekoruar me to, po kjo mua me duket normale”, ka thënë Vucic. /gazetametro.net