Sulmohet fizikisht trajneri kosovar Faruk Statovci
-
06/02/2023 | 10:15
Analisti dhe trajneri i futbollit, Faruk Statovci është sulmuar fizikisht nga dy persona të maskuar para banesës së tij në Prishtinë.
Kanal10 merr vesh se në sulmin i cili ka ndodhur menjëherë pas emisionit “Kampionët”, në orët e para të mëngjesit të së hënës, Statovci ka pësuar disa lëndime trupore dhe për këtë është trajtuar në QKUK.
Gjendja e tij është stabile.
Sulmi ndaj Statovcit mësohet të ketë ndodhur teksa ai ishte duke hyrë në banesën e tij në Breg të Diellit në Prishtinë.
Kanal10 mëson se sulmi ndaj Statovcit ngjau nga dy persona të maskuar të cilët së bashku e kanë goditur për disa minuta në trup dhe në kokë.
Nuk dihen motivet e sulmit ndaj Statovcit.
Sic mëson Kanal10, pak çaste më vonë, në vendin e ngjarjes ka mbërritur edhe futbollisti, Dren Gashi i cili e ka ndihmuar Statovcin, për të lajmëruar policinë dhe ndihmën e shpejtë.
Në vendin e ngjarjes ka ardhur edhe Policia e Kosovës, e cila është duke e hetuar rastin.
