Si u bllokua Kryeministri në Veri?

Agjencia serbe e lajmeve Tanjug ka raportuar për incidentin që ndodhi në Rudare rreth orës 13:00, ku Kryeministri i Kosovës Isa Mustafa bashkë me komandantin e KFOR-it, Giovani Fungo janë penguar nga rreth 100 banorë serbë të cilët bllokuan rrugën duke vendosur kamionë në rrugën ku ishte planifikuar të kalonte eskorta e të parit të Qeverisë, transmeton Gazeta Metro.

Edhe pse zyrtarët e Qeverisë së Kosovës u munduan ta mohojnë incidentin, Mustafa është detyruar të kërkojë rrugë alternative që të marrë pjesë në përurimin e urës së ndërtuar nga NATO që lidh Leposaviqin me Zveçanin, duke arritur me rreth dy orë vonesë në vendin ku u përurua ura.

“Ne ishim në inaugurim të urës e përfunduam atë dhe është një argument që neve askush nuk mund të na ndalë të qarkullojmë në vendin tonë dhe t’i vizitojmë vendet tona”, tha Mustafa duke komentuar ngjarjen e sotme.

Pjesë e udhëtimit ka qenë edhe komandanti i KFOR-it, Giovanni Fungo për të cilin është liruar rruga. Gjatë mbrëmjes, serbët e veriut kanë bërë me dije se kanë ndërpresin çdo komunikim me KFOR-in për shkak të ngjarjes së sotme.

Ndëkohë, agjencia e lajmeve Tanjug ka disa fotografi që dokumentojnë bllokimin e rrugës që e organizuan banorët serbë për Isa Mustafën.