Shkurte Fejza dhe Arif Vladi performojnë në ‘Marshin për Liri’ më 12 shtator

Platforma qytetare “Liria Ka Emër” do të organizojë të shtunën, më 12 shtator, “Marshin për Liri” në Prishtinë, në prag të shpalljes së aktgjykimit ndaj ish-krerëve të UÇK-së në Hagë.

Marshi nis në orën 14:00 nga sheshi “Skënderbeu”, ndërsa organizatorët presin pjesëmarrje të gjerë qytetare.

Në kuadër të programit do të performojnë këngëtarët e njohur Shkurte Fejza dhe Arif Vladi, me repertorin e tyre të këngëve patriotike dhe të lidhura me luftën për liri.

Aktiviteti mbahet katër ditë para 16 shtatorit, datës kur pritet shpallja e aktgjykimit ndaj Hashim Thaçit, Kadri Veselit, Jakup Krasniqit dhe Rexhep Selimit. Organizatorët kanë thënë se marshi synon të përcjellë mesazhe për drejtësi, dinjitet dhe mbështetje për ish-krerët e UÇK-së.