Reduktimi i KFOR’it në Ibër, Ramadani: Mendjefëmijët e VV’së nuk i kuptojnë këto tema

Deputeti i zgjedhur i Aleancës, Burim Ramadani, reagoi ndaj disa përfaqësuesve të Vetëvendosjes, duke vënë në pikëpyetje njohuritë e tyre lidhur me temat e sigurisë kombëtare, transmeton Gazeta Metro.

Në reagimin e tij, Ramadani ka thënë se çështjet që kanë të bëjnë me angazhimin e KFOR-it dhe përgjegjësitë e Policisë së Kosovës nuk janë vendosur rastësisht, por janë rezultat i një procesi të gjatë konsultimesh dhe takimesh.

Sipas tij, ndër zhvillimet e diskutuara kanë qenë ndryshimi i formës së pranisë së KFOR-it në urë, mbrojtja e Manastirit të Deçanit nga Policia e Kosovës dhe patrullimet e përbashkëta në zonën kufitare.

“Këta mendjefëmijët e VV-së, me pozita të deputetëve apo në KQZ, as nuk kuptojnë dhe as nuk mësojnë gjë, pavarësisht sa shtrenjtë paguhen nga populli”, shkroi  Ramadani.

Ai tha se për këto tema kanë diskutuar një rreth i kufizuar njerëzish, ndërsa gjatë këtij procesi, sipas tij, janë marrë në konsideratë edhe qëndrimet e tij profesionale. Në përmbyllje, Ramadani u ka kërkuar përfaqësuesve të VV-së që më shumë vëmendje t’i kushtojnë punës dhe interesit shtetëror, sesa reagimeve në platformat sociale./gazetametro.net