Reagon Presidenti Thaçi pas arrestimit të Haradinajt

Arrestimin e Kryetarit të AAK, Ramush Haradinaj e ka dënuar edhe Presidenti i Kosovës Hashim, Thaçi.

Presidenti i Republikës së Kosovës, Hashim Thaçi ka reaguar pas arrestimit të Ramush Haradinajt, duke e quajtur të dënueshëm dhe të papranueshëm, vetëm pë shkak të një urdhër-arresti të Serbisë.

”I dënueshëm dhe i papranueshëm, në çdo rrafsh, është ndalimi i z. Haradinaj në cilindo shtet të botës, vetëm për shkak të një urdhër-arresti të shtetit të Serbisë”, tha Thaçi.

“Ne pjesëtarët e Ushtrisë Çlirimtare të Kosovës jemi krenarë që kemi luftuar kundër ligjeve diskriminuese e kriminale të regjimit të Sllobodan Millosheviqit, ndërkaq drejtësinë tonë e vërtetoi edhe bota e lirë dhe demokratike kur ndërmori fushatën e bombardimit të caqeve serbe”, ka shkruajtur presidenti i shtetit.

Sipas tij, institucionet e shtetit të Kosovës po punojnë me tërë mekanizmat që kanë në dispozicion, që sa më parë të korrigjohet ky gabim dhe që Haradinaj të lihet i lirë, siç e meriton.

“Ky është edhe një argument tjetër pse Kosova duhet të jetë pjesë e institucioneve ndërkombëtare, që ato të jenë në gjendje të zbulojnë të vërtetën për Kosovën dhe Serbinë, për drejtësinë”, shkruajti Presidenti Hashim Thaçi./Gazetametro.net