Raporti i KE-­së, Rama e Meta komentojnë kërkesën e PD­-së

Pas marrjes në dorëzim të raportit vjetor të KE-së për ecurinë e Shqipërisë, dy drejtuesit kryesor të koalicionit të majtë, kryeministri Edi Rama dhe kryeparlamentari Ilir Meta i janë përgjigjur dhe kushtit të Partisë Demokratike,  që kërkon shkuarjen në zgjedhje me anë të një qeverie teknike.

“Kemi marrë rekomandimin pozitiv, duke bërë faktikisht të mundur, realizimin e njërit prej zotimeve më ambicioze të vitit 2013. Si mundet që një proces i tillë dhe një mandat i tillë të vihet në diskutim për arsye të axhendës politike, apo të strategjisë dhe taktikes së opozitës! Më duket pa sens” – tha Rama pas pyetjes së gazetarëve.

Ndërsa kryeparlamentari Ilir Meta në përgjigjen e tij në lidhje me kushtin e PD-­së për qeveri teknike u fokusua më tepër te nevoja e plotësimit të kushteve të opozitës sa i përket reformës zgjedhore.

“Besoj se çdo kërkesë e drejtë, e mundshme, e arsyeshme dhe e realizueshme nga ana e opozitës, që ndihmon transparencën dhe integritetin e reformës zgjedhore dhe procesit zgjedhor duhet marrë në konsideratë dhe duhet bërë çdo përpjekje për ta realizuar atë”, theksoi Meta.