Rama sot në Bruksel: Shqipëria prezanton potencialin turistik në Samitin e Turizmit

Kryeministri Edi Rama ndodhet sot në Bruksel, ku do të marrë pjesë në Samitin e Euronews për Turizmin, transmeton Gazeta Metro.

Në aktivitet marrin pjesë zyrtarë, përfaqësues të biznesit, investitorë dhe profesionistë të fushës nga vende të ndryshme.

Takimi do t’i kushtohet zhvillimeve që po ndryshojnë industrinë e turizmit, përfshirë mënyrën se si po evoluon kërkesa e vizitorëve, ndikimin e teknologjisë dhe format e reja të investimit.

Një pjesë e diskutimeve do të fokusohet edhe te ndërtimi i infrastrukturës, rritja e cilësisë së shërbimeve dhe krijimi i një oferte më të qëndrueshme për turistët.

Në këtë kuadër, pjesëmarrja e Shqipërisë shihet si një mundësi për të paraqitur në Bruksel zhvillimin e sektorit turistik dhe mundësitë që ofron vendi për vizitorë dhe investitorë të huaj.

Turizmi është kthyer në një nga sektorët me rëndësi për ekonominë shqiptare, ndërsa institucionet shqiptare synojnë të rrisin më tej interesin ndërkombëtar për vendin si destinacion pushimesh dhe investimesh./gazetametro.net