Prishtina dhe Ferizaj pa plan të punës

Kuvendit Komunal i Prishtinës dhe ai i Ferizajt, kanë nisur vitin 2017 pa plan konkret të punës. Ky konstatim ka ardhur nga Iniciativa për Progres INPO, e cila monitoron punën e këtyre kuvendeve.

“Mosmiratimi i planit vjetor të punës para se gjithash përbën shkelje të Ligjit Nr.03/L-040 për Vetëqeverisjen Lokale, neni 40, i cili  i obligon kuvendet komunale të miratojnë planin vjetor të punës, përgjegjësi kjo e cila nuk mund të delegohet, si dhe tregon seriozitetin e anëtarëve të kuvendit karshi detyrave dhe përgjegjësive të tyre në përmbushjen e misionit të punës së kuvendit”, thuhet në vlerësimin e kësaj organizate.

Bazuar në të dhënat e monitorimit, organizata INPO, ka vlerësuar se agjenda e këtyre dy kuvendeve komunale është e varur pothuajse tërësisht nga agjenda e ekzekutivit të komunës apo kryetarit.

“Kësisoj, agjenda konceptohet ad hoc pa pasur asnjë rrjedhë logjike në qeverisje  dhe ushtrim të funksionit të kontrollit ndaj ekzekutivit dhe organeve tjera vartëse të tyre”, thuhet në komunikatën për media të kësaj organizate./gazetametro.net