Politikanëve serbë u kërkohet të veprojnë të pavarur nga Beogradi

Ditën e parë të punës për këtë vit Komisioni i politikës së jashtme të Parlamentit Evropian në Bruksel do t’ua kushtojë Kosovës dhe Serbisë.

Në rend dite do të jenë debatet për këto dy shtete në leximin e parë të draftit të raporteve të përgatitura nga raportuesit Ulrike Lunaçek për Kosovën dhe David McAllister për Serbinë.

“Koha Ditore” ka siguruar kopjen e draftit të raportit për Kosovën dhe në të, pak a shumë, janë përfshirë pikat e pritura, të cilat shpesh janë përmendur edhe në të kaluarën.

Nuk ka risi sa i përket përsëritjes së thirrjes për 5 shtete anëtare të BE-së, të cilat nuk e kanë njohur Kosovën që ta bëjnë një gjë të tillë, thirrje që është bërë gjithmonë nga Parlamenti Evropian, madje edhe para se Kosova ta kishte shpallur pavarësinë.