Përkeqësohet ajri në kryeqytet

Sipas raportit për cilësinë e ajrit në Prishtinë gjatë ditëve të fundit 23-24 janar, del se ajo është përkeqësuar.

Bazuar në matjet e realizuara nga Institutit Hidrometeorologjik i Kosovës, sipas analizës së rezultateve të fituara nga monitorimi automatik i cilësisë se ajrit është vërejte së gjatë ditëve të fundit janë paraqitur tejkalime të vlerave kufitare ditore me PM10.

Vlera kufitare ditore e lejuar për mbrojtjen e shëndetit të njeriut është 50ug/m3, ndërsa gjate këtyre ditëve vlera maksimale e mesatares ditore është shënuar me date 23.01.2017 e cila ka arritur në vlerën 68.9µg/m3. Për më shumë shih grafikonin në vazhdim, transmeton gazetametro.net.

Ndërsa përqëndrime të larta janë paraqitur me ndotësin PM 2.5, i cili ka arritur vlerën maksimale të mesatares ditore po të njëjtën ditë dhe në të njëjtin lokacion, nga ku arrin vlerën në 67.9µg/m3.

Ky përkeqësim i gjendjes është pasojë e ndryshimit të kushteve atmosferike, përkatësisht paraqitjes së kushteve të pafavorshme meteorologjike për shpërndarjen e koncentrimit të ndotësve, siç janë, dukshmëria e dobët (mjegulla), shpejtësia e erës, lagështia e lartë e ajrit, shtypja atmosferike, temperatura e ulëta. Kjo gjendje ka ndikuar që të mos ketë shpërndarje të koncentrimit të ndotësve që emitohen nga industria, transporti dhe nga ngrohtoret kolektive dhe ato individuale, duke përkeqësuar gjendjen e cilësisë së ajrit.

Shënim: #Vlerësimi i përqendrimit të grimcave PM 2.5 në përputhshmëri me standardet e kualitetit të ajrit bëhet duke u bazuar ne vlerën vjetore.