Loading…

PDK – LDK pajtohen për buxhetin

  • 19/12/2016 | 16:17

PDK – LDK pajtohen për buxhetin

Partitë e koalicionit qeveritar kanë harmonizuar qëndrimet për buxhetin e vitit 2017 dhe se si i tillë ai pritet që të miratohet deri në fund të këtij viti.


Kështu kanë deklaruar për Radion Evropa e Lirë zëvendësministrat në Ministrinë e Financave.

Zëvendësministri i Financave nga radhët e Partisë Demokratike të Kosovës, Isni Kilaj, ka thënë se kanë arritur pajtueshmëri të kërkesave që ata i kanë paraqitur.

“Ne jemi harmonizuar, jemi dakorduar me kërkesat që ka pasur Partia Demokratike e Kosovës dhe nuk kemi më telashe dhe besoj që buxheti do të aprovohet. Pra, buxheti do të aprovohet gjithsesi”, ka bërë të ditur Kilaj.

Partia Demokratike e Kosovës fillimisht nuk ishte pajtuar me buxhetin e vitit 2017, për shkak të ndarjes dhe planifikimit të tij. Ata kishin shprehur ankesa tek ndarja e mjeteve të buxhetit në projektet infrastrukturore. PDK kishte aluduar që mjete të shumta kishin shkuar në ministri të cilat udhëhiqen nga Lidhja Demokratike e Kosovës.

Buxheti i Kosovës për vitin 2017 tashmë i është proceduar Kuvendit, ku pas shqyrtimit nëpër komisionet përkatëse, pritet të dalë në Kuvend për miratim.

Zëvendësministri i Financave nga Lidhja Demokratike e Kosovës, Agim Krasniqi, i ka thënë REL se kërkesat e ngritura nga partneri i koalicionit, apo edhe kërkesat që mund të dalin nga partitë opozitare, janë çështje që rregullohen.

“Çështjet e buxhetit janë diskutuar në nivele politike. Ka pasur disa kërkesa që kanë ardhur nga PDK – partneri i koalicionit. Ajo çka është më rëndësi është duke u diskutuar që kjo çështje të tejkalohet. Unë besoj që kjo ka mundësi. Asnjëherë nuk ka ndodhur që të mos ketë amandamentim mes dy leximeve. Këto kërkesa prej partnerit të koalicionit, por edhe partive opozitare apo deputetëve, janë çështje që mund të rregullohen në mes dy leximeve”, thekson Krasniqi.

Sipas procedurave ligjore, buxheti i Kosovës, ka thënë Krasniqi duhet të miratohet deri më 31 dhjetor.

Nëse buxheti nuk arrin të miratohet në Kuvendin e Kosovës, sipas afatit kohor, në bazë të Ligjit për Menaxhimin e Financave, në tre muajt e parë të vitit të ardhshëm shpenzimet buxhetore duhet të realizohen në 1/12 e buxhetit të këtij viti, që sipas Krasniqit mund të sjell implikime.

“Që të mos futemi në këto faza, pasi që ka implikime të shumta, duhet të miratohet buxheti me kohë. Nga viti i ardhshëm do të jetë bukur problem çështja e pagesave, pasi që ka pasur ndryshime brenda këtij viti. Çështja e skemave sociale, duke përfshirë edhe veteranët, është problematike të fillohet me buxhetin fillestar që është 1/12 e buxhetit të këtij viti”, thekson Krasniqi.

Buxheti i Kosovës për vitin e ardhshëm do të jetë mbi 2 miliardë euro, kurse pjesa më e madhe do të gjenerohet nga të hyrat fiskale.

Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +383 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë