‘Pazari’ me pozita, Bajrami direkt Kurtit: Oferta s’ishte kompromis, ishte shantazh i paketuar

Deputetja e LDK-së, Hykmete Bajrami, nuk i kursyeu fjalët e ashpra ndaj kryeministrit, Albin Kurtit, pasi ky i fundit i hodhi partisë së saj një ‘ofertë’ në tavolinë për të ndarë pushtetin, transmeton Gazeta Metro.

Për Bajramin, propozimi që LDK të marrë katër ministri dhe një zëvendëskryeministër në këmbim të votës për presidentin, nuk është asgjë tjetër veçse një lojë politike.

Sipas saj, Kosova po vuan nga keqqeverisja që prej gjashtë vitesh dhe kjo lëvizje e fundit e kryeministrit tregon se ai nuk po kërkon bashkëpunim të sinqertë, por vetëm po ushtron forcë për të mbajtur nën kontroll presidencën.

“Kjo nuk është ofertë – është presion. Kjo nuk është zgjidhje – është një tjetër përpjekje për të imponuar vullnetin e një njeriu mbi vullnetin e qytetarëve”, shkroi Bajrami.

Deputetja rikujtoi se problemet e qytetarëve janë shumë më të thella sesa thjesht emrat nëpër zyra. Ajo përmendi shtrenjtimin e jetës, krizën e energjisë dhe ikjen masive të rinisë, duke akuzuar qeverinë se ka humbur kontaktin me realitetin./gazetametro.net