Pas trenit, muri në Mitrovicë i ka ditët e numëruara

Presidenti i Kosovës, Hashim Thaçi në një lidhje direkte në edicionin e lajmeve të Klan Kosovës, ka thënë se situata në Kosovë mund të bëhet më e ndjeshme, nëse tolerohet futja e trenit serb.

Sipas tij, kështu do të shkelej Kushtetuta e Kosovës.

“Nuk justifikohet cenimi i integritetit territorial të Kosovës”, ka thënë Thaçi.

“Gjithçka që është në kundërshtim me ligjet e Kosovës, nuk mund të niset për në Kosovë, nuk do të lejojmë të fyhet dinjiteti dhe integriteti ynë”.

I pari i vendit ka thënë se ‘Kushtetuta dhe ligjet e Kosovës  do të respektohen në përpikmëri dhe vendosmëri të lartë’.

Thaçi ka thënë poashtu se edhe muri i ndërtuar në veri do të rrënohet shumë shpejt.

“Edhe muri  në veri i ka ditët e numëruara, do të rrënohet tërësisht dhe jo të zvogëlohet apo shkurtohet”.

Ai poashtu ka thënë se vendimi për të ndaluar futjen e trenit serb në Kosovë është vendim i të gjitha institucioneve të Kosovës.

“Institucionet veprojnë si tërësi dhe jo si të veçuara, edhe presidenti edhe Qeveria dhe të gjitha institucionet përkatëse”.

Thaçi ka dashur të sigurojë të gjithë qytetarët që treni nuk do të futet në Kosovë, duke u bërë thirrje për qetësi.

“Unë dëshiroj t’i sigurojë të gjithë se ky tren nuk futet në Kosovë, institucionet janë në gjendje gatishmërie, do të respektohet Kushtetuta, unë i ftoj për qetësi dhe mirëkuptim, institucionet do të kryejnë detyrat dhe përgjegjësitë e tyre”. /gazetametro.net