Paraburgim për Lutfi Dervishin
-
12/01/2017 | 18:35
Gjykata Themelore e Prishtinës ka vendosur masën e paraburgimit prej 30 ditësh ndaj urologut Lutfi Dervishi, i cili u arrestua të martën ndërkohë që ishte në arrati qe disa muaj.
Tridhjetë ditë paraburgim është masa e sigurisë e caktuar nga Gjykata Themelore e Prishtinës ndaj Lutfi Dervishit, urologu i cili u arrestua të martën pas një arratie disamuajshe.
Këtë vendim e mori gjyqtarja e EULEX-it, Maria Tuma, e cila miratoi kërkesën e prokurorit amerikan, Charles Hardaway.
Hardaway kërkesën e tij për caktimin e paraburgimit e ka arsyetuar me rrezikun e ikjes së të akuzuarit.
Lajmin e konfirmoi avokati i Lutfi Dervishit, Valon Hasani.
Hasani arrestimin e cilësoi të kundërligjshëm pasi që sipas tij, fletarresti ishte tashmë i shfuqizuar dhe vetëm pasi e kishin kuptuar këtë ishte bërë një fletarrest i ri.
Urologu Lutfi Dervishi u arrestua të martënpas disa muajsh arratie, vetëm disa ditë pasi Gjykata Supreme e ktheu në rigjykim rastin “Medicus”, edhe pse dënimet e Themelores për këtë rast ishin vërtetuar edhe nga Apeli.
Dervishi ishte dënuar në vitin 2013 me 8 vjet burg nga Gjykata Themelore e Prishtinës nën akuzën për krim të organizuar dhe trafikim me qenie njerëzore, ndërsa këtë vendim ia vërtetoi në vitin 2016 edhe Gjykata e Apelit.
Seanca e djeshme në rastin ndaj Lutfi Dervishit u mbyll për media.
