Pajaziti: Deputetët mos të përfitojnë politikisht nga vdekja e Deharit

Shefi i grupit parlamentar të PDK-së, Zenun Pajaziti, duke shprehur ngushëllime familjes Dehari për vdekjen e Astritit, ka kërkuar nga Ministria e Drejtësisë dhe institucionet tjera që sa më shpejtë të dalin me rezultatet dhe provat për të sqaruar vdekjen e ish-anëtarit të Lëvizjes Vetëvendosje.

Ai ka kërkuar nga deputetët që të mos përfitojnë politikisht nga vdekja e Deharit, derisa ka shtuar se kolegët e tij nuk duhet të luajnë rolin e organit të drejtësisë për rastin e vdekjes së Deharit.

“Kërkojmë nga Ministria e Drejtësisë që të dalin sa më shpejtë me të dhënat, provat dhe argumentet për të sqaruar gjithçka rreth vdekjes së Astrit Deharit. Kërkoj nga Policia e Kosovës dhe prokuroria që të mos dalin me deklarata. Këto nuk i bëjnë mirë familjes Deharit. Ne nuk duhet të bëjmë organin e drejtësisë dhe të mos ndikojmë në sqarimin e këtij rasti dhe procedurave gjyqësore për këtë rast”, ka thënë Pajaziti.