Nis votimi në referendumin për emrin në Maqedoni

Qytetarët në Maqedoni kanë filluar të dalin në pikat e votimit për të votuar lidhur me referendumin për emrin e Maqedonisë

Në pika të votimit dhe rrugë të Shkupit ende është qetë në këto orë të para të mëngjesit, megjithatë nga anketat e bëra me qytetarë dhe vëzhgues, thonë se pritet që të ketë interesim të madh sot.

Qytetarët që kanë dalë në votim i thanë KosovaPress-it se presin që të bëhet më mirë pas kësaj dite.

Ndërkohë, Gjyljana Zairi, drejtoreshë në qendrën 2827 në shkollën fillore “Kongresi i Manastirit” në komunën e Çairit, tregoi për KosovaPress se çdo gjë ka filluar me kohë në këtë pikë votimi dhe me të gjitha materialet e nevojshme.

Në këtë pikë votimi të drejte vote kanë 1006 votues.

Të drejtë vote sot kanë 1.806.336 votues, të regjistruar në Listën Zgjedhore. Vendvotimet më 30 shtator do të hapen prej orës 7 deri në orën 19.

Votimi do të monitorohet nga 11 927 vëzhgues nga vendi dhe 493 të huaj. Lista zgjedhore numëron gjithsej 1 milion e 806 mijë e 336 votues me të drejtë vote.

Referendumi mbahet pas arritje së marrëveshjes mes qeverisë së Maqedonisë dhe asaj të Greqisë për emrin.

Referendumi është përkrahur nga partitë e pozitës maqedonase dhe nga të gjitha partitë shqiptare në këtë vend, kurse kundërshtohet nga opozita maqedonase.

Pro emrit dhe referendumit janë shprehur vendet e Bashkimit Evropian, të cilat e kanë quajtur edhe si referendum për hyrjen e Maqedonisë në NATO dhe BE.