Nis seanca për ndërhyrje në drejtësi: Thaçi i vetëm në sallë, të tjerët me videolidhje

Ka nisur në Hagë seanca për rastin e dytë penal ndaj ish-presidentit Hashim Thaçi, i cili së bashku me katër të akuzuar të tjerë përballet me pretendime për ndërhyrje në administrimin e drejtësisë, transmeton Gazeta Metro.

Thaçi ndodhet fizikisht në sallën e gjyqit, ndërsa Hajredin Kuçi, Isni Kilaj, Bashkim Smakaj dhe Fadil Fazliu po e ndjekin seancën përmes lidhjes me video.

Në këtë seancë palët do t’i paraqesin qëndrimet e tyre të fundit para trupit gjykues. Fjalën fillimisht do ta ketë Zyra e Prokurorit të Specializuar, pas së cilës do të vijojnë ekipet mbrojtëse të të akuzuarve.

Ky proces shënon fazën përmbyllëse të çështjes, pas së cilës gjykata do të shqyrtojë argumentet e palëve para se të marrë vendimin për rastin.