Ndërhyrja e Qeverisë në buxhet, KGJK shqyrton dërgimin e çështjes në Kushtetuese

Këshilli Gjyqësor i Kosovës (KGjK) po shqyrton mundësinë që çështjen e ndërhyrjes së Qeverisë në buxhetin e Këshillit ta dërgojë në Gjykatën Kushtetuese, për shkak të mungesës së theksuar të mjeteve financiare, transmeton Gazeta Metro.

Drejtori i Përgjithshëm i Sekretariatit të KGjK-së, Shkëlzen Maliqi, bëri të ditur se kërkesa buxhetore për vitin 2026 është miratuar rreth 15 milionë euro nën shumën e kërkuar nga Këshilli.

“Unë i kam paraqitur në detaje te Asamblesë së Kryetarëve gjendjen me buxhet që e kemi. I kem njoftuar edhe më herët që kërkesa buxhetore e Këshillit për vitin 2026 është miratuar me rreth 15 milionë euro më pak sesa që ne kemi kërkuar”, tha ai.

Sipas Maliqit, KGjK-ja aktualisht ka mbi 3.5 milionë euro detyrime ndaj operatorëve dhe personave të dënuar pa bazë.

“Si rezultat i krejt këtyre mungesave, përfshirë edhe mungesa në subvencione që janë të dënuarit pa bazë, në gjendjen aktuale që e kemi me buxhetin e Këshillit jemi diku për mbi 3 milion e 500 mijë euro minus ose mjete që kemi borxh ndaj operatorëve dhe të dënuarve pa bazë”, tha ai.

KGjK-ja po shqyrton mundësinë e riorganizimit të mjeteve brenda buxhetit, ndërsa në fund të vitit pritet të kërkojë fonde shtesë nga Ministria e Financave./gazetametro.net