Mustafa e quan ‘qëndrim dinjitoz’ mosnënshtrimin e 6 deputetëve ndaj Abdixhikut

Isa Mustafa ka thënë se gjashtë deputetët e LDK-së kanë bërë mirë që nuk e kanë votuar Bekim Sejdiun për President, përcjell Gazeta Metro.

Ai tha se kjo nuk ka të bëjë vetëm me Sejdiun, por me mënyrën se si po zhvillohet krejt procesi, dhe se si pa e pyetur askënd u zhvillua marrëveshja mes LDK’së e VV-së, duke cilësuar “dinjitoz’ veprimin e 6-qes.

“Qëndrimin e gjashtë deputetëve të LDK-së e konsideroj të drejtë, legjitim dhe dinjitoz.”

Mustafa tha se LDK-ja nuk duhet të bëhet pjesë e marrëveshjeve që, sipas tij, janë jashtë Kushtetutës.

“Parimi është që të mos bëhen pjesë e marrëveshjes dhe veprimeve jashtëkushtetuese”, tha Mustafa për Express.

Ai gjithashtu tha se deputetët nuk mund të detyrohen të votojnë vetëm sepse kështu kanë vendosur forumet e partisë.

“Në qoftë se mendon dikush t’i detyrojë deputetët të votojnë sipas qëndrimeve të forumeve të emëruara nga një individ, atëherë bëhet fjalë për mungesë elementare të njohjes së Kushtetutës dhe demokracisë së brendshme.”

Të martën, gjashtë deputetët e LDK-së Avdullah Hoti, Hykmete Bajrami, Kujtim Shala, Armend Zemaj, Arben Gashi dhe Janina Ymeri – thanë se nuk do ta votojnë Sejdiun për President./gazetametro.net