Mitrovicë: 34-vjeçarja hidhet nga kati i dytë i banesës, shpëton mrekullisht e dërgohet në QKUK

Depresioni shpeshherë është cilësuar si një faktor serioz që mund të drejtojë njeriun drejt vetëvrasjes. Ndjenjat e dëshpërimit, zemërimit, e depresionit jo rrallëherë i kanë shtyrë të rinjtë të tentojnë të kryejnë këtë akt.

Një rast i tillë dhe mjaft i rëndë ka ndodhur sot në Mitrovicë, ku një grua ka tentuar t’i jap fund jetës duke u hedhur nga kati i dytë i një ndërtese në rrugën “Nexhip Dragaj.

Viktima, e moshës 34-vjeçare ka shpëtuar mrekullisht dhe fillimisht i është dhënë ndihma mjekësore në vendin e ngjarjes e më pas nga Spitali Rajonal i Mitrovicës është transferuar në Qendrën Klinike Universitare të Kosovës për trajtim të mëtutjeshëm mjekësor, raporton Gazeta Sinjali.

Rasti është raportuar në Polici nga nëna e saj e cila e pa momentin e tmerrshëm kur e bija kërceu nga kati i dytë i banesës, por fatmirësisht shpëtoi dhe kishte shenja jete.

Posa Policia është njoftuar për rastin, një patrullë policore ka dalë në vendin e ngjarjes, ku janë bërë ekzaminimet e nevojshme dhe më pas për rastin është njoftuar edhe Prokurori i Shtetit.

Kujtojmë se rastet e tilla janë shpeshtuar shumë dhe kjo po cilësohet si një dukuri mjaft shqetësuese.