Ministri i Brendshëm probleme me shëndetin, anulon raportimin në Komision

Ministri i Punëve të Brendshme, Flamur Sefaj nuk do të raportojë para deputetëve të Kuvendit të Kosovës (anëtarë të Komisionit për Punë të Brendshme dhe Siguri), lidhur me  ngjarjet e fundit që kanë ndodhur në Inspektoriatin e Policisë.

Kjo pasi, siç thanë nga Ministria e Brendshme për Gazetën Metro, ministri Sefaj nuk është mirë me shëndet madje nuk ka dalë në punë.

‘Ministri nuk ka dalë në punë, është në gjendje gripoze’, ka thënë Rroksana Qarri, nga zyra për informim në Ministrinë e Punëve të Brendshme

Ndërkohë, mbledhja ka filluar dhe deputeti i NISMA’as Haxhi Shala, njoftoi anëtarët e komisionit se ministri është i sëmurë dhe sot nuk do të raportojë para tyre.

‘Ministri i Brendshëm na ka njoftuar se për shkak të një gripi nuk do jetë sot këtu për të na raportuar për ngjarjet e fundit që kanë ndodhur në Inspektoriatin e Policisë’, tha deputeti Shala.

Ndryshe, Ministri Sefaj kishte për të raportuar  rreth zhvillimeve që kanë ndodhur në Inspektoratin Policor të Kosovës me ç’rast është publikuar një bisedë mes kryeshefit Hilmi Mehmeti dhe disa vartësve të tij ku dëgjohet presioni që u bën atyre për të ndikuar në punësime. Pas kësaj Sefaj ka suspenduar nga puna kryeshefin Mehmeti ndërsa lidhur me këtë rast Prokuroria është duke i bërë hetimet./Gazetametro.net