Merz: Ukraina do të ketë mbështetjen tonë

Kancelari gjerman, Friedrich Merz, ka mbërritur të dielën në Kiev në një vizitë të paparalajmëruar, duke udhëtuar me tren drejt kryeqytetit ukrainas.

Merz deklaroi se qëllimi kryesor i vizitës është të demonstrojë mbështetjen e vazhdueshme të Gjermanisë për Ukrainën, në një periudhë që ai e konsideron vendimtare për luftën dhe sigurinë evropiane.

“Ukraina do të ketë nevojë për mbështetjen tonë të plotë në javët në vijim. Nëse Rusia nuk ndalet, herët a vonë makineria e saj luftarake do të drejtohet kundër nesh”, deklaroi Merz pas mbërritjes në Kiev.

Ai theksoi se Gjermania dhe Ukraina po bashkëpunojnë edhe në sektorin e mbrojtjes, duke zhvilluar teknologji që, sipas tij, forcojnë sigurinë e të dyja vendeve.

Gjatë vizitës, Merz shoqërohet nga ministrja e Ekonomisë, Katherina Reiche, si dhe një delegacion biznesi nga sektorët e mbrojtjes dhe energjisë.

Sipas burimeve qeveritare, Gjermania pritet të përshpejtojë dërgimin e mijëra dronëve përgjues dhe prodhimin e armëve me rreze të gjatë veprimi. Për këtë qëllim janë paraparë 1 miliard euro nga fondet buxhetore të miratuara, ndërsa 350 milionë euro të tjera do të ndahen për riparimin dhe restaurimin e termocentraleve të dëmtuara.

Kjo është vizita e katërt e një kancelari gjerman në Ukrainë që nga fillimi i pushtimit të plotë rus. Merz e kishte vizituar Kievin edhe në maj të vitit 2025, ndërsa para se të merrte postin e kancelarit kishte qenë atje në maj të vitit 2022 dhe dhjetor të vitit 2024.