Mediat zvicerane: Matoshi lë Zvicrën dhe zgjedh Kosovën, njësoj si Hajdari e Avdullahu

Futbollisti i ri i Kombëtares së Kosovës, Valmir Matoshi, bëri paraqitjen e tij të parë me fanellën “Dardane” në një ndeshje miqësore ndaj Republikës së Çekisë.

Debutimi i tij ka tërhequr vëmendje edhe në Zvicër, pasi mesfushori 22-vjeçar më parë kishte qenë pjesë e përfaqësueses zvicerane U21, përpara se të vendoste të përfaqësojë Kosovën në nivel senior.

Sipas mediave zvicerane, ky hap i Matoshit shihet si vazhdim i rasteve të ngjashme me lojtarë të tjerë që kanë zgjedhur Kosovën, duke nxitur diskutime për vendimet e tyre për ndryshimin e përfaqësueses.

“Ish-lojtari i kombëtares zvicerane U21, Valmir Matoshi, tani luan për Kosovën. Mesfushori 22-vjeçar i FC Thun debutoi për ekipin A kombëtar të Kosovës të dielën në një ndeshje miqësore në Republikën Çeke”,  shkroi 24heures.ch.

Në aspektin sportiv, Matoshi është pjesë e FC Thun, ku gjatë edicionit të fundit ka zhvilluar 35 ndeshje, duke realizuar 6 gola dhe 4 asistime, duke u dalluar si një nga lojtarët më produktivë të skuadrës.

Në planifikimet e Federatës së Futbollit të Kosovës, ai shihet si një prej emrave të mundshëm për të ardhmen e mesfushës së Kombëtares, me pritshmëri që të ketë rol më të madh në ndeshjet e ardhshme.