Loading…

‘Me gjet paqe’: Bashkëshortja e Agonis Tetajt kërkon nga gjykata drejtësi që fëmijët e saj të rriten pa presion të gjakmarrjes

  • 29/11/2023 | 17:58

‘Me gjet paqe’: Bashkëshortja e Agonis Tetajt kërkon nga gjykata drejtësi që fëmijët e saj të rriten pa presion të gjakmarrjes

Bashkëshortja e Agonis Tetajt ka kërkuar nga gjykata drejtësi për vrasjen e bashkëshortit të saj nga Shaban Gogaj, me qellim që familja e saj të gjej paqe dhe fëmijët e saj mos të rriten me presion të gjakmarrjes.


Këtë deklarim e dëmtuara A.C e bëri të mërkurën në seancën e rishqyrtimit për këtë rast, në Gjykatën Themelore të Pejës, raporton “Betimi për Drejtësi”.

E dëmtuara A.C, në cilësinë e dëshmitares tha që edhe pse kishin kaluar 5 vite, ajo tha kërkon që të vendoset drejtësia dhe ata si familje të gjejnë paqe, ku me anë të drejtësisë fëmijëve të saj tu jepet mundësia të rriten të qetë e pa presionin e gjakmarrjes.

“Me anë të drejtësisë fëmijëve të mijë tu jepet mundësia të rriten të qetë pa presionin e gjakmarrjes sepse kur të vendoset drejtësia karshi veprës që e ka parë krejt Kosova me anë të videos, edhe për ne si familje është me e lehtë me gjet paqe dhe fëmija me u drejtu në një jetë normale”, tha e dëmtuara C.

Ajo shtoi se nga momenti që është shfaq video pa autorizimin e saj, përkundër kujdesit që ka ndaj fëmijëve që të mos shfaqet ajo video para tyre, ajo tha se ata vetëm kanë filluar t’i bëjnë pyetje lidhur me babain e tyre.

“Dhe unë kur kam fillu me jau spjegu situatën edhe pse nuk ka qenë e lehtë ata me një pyetje të të thjeshtë mua më kanë lënë pa përgjigje. Pyetja e tyre ka qenë nanë e pse e vrau babin?, e unë lutna e shpresoj e besoj që ky gjykim ka me qenë rrezultat i vendosjes së drejtësisë dhe kur fëmijët e mijë të pyesin unë kam më ju thanë se po e ka vra babën e juaj pa asnjë arsye, sepse vrasjen nuk e arsyetoj në asnjë formë, por e ka marrë dënimin e merituar”, ka shtuar ajo.

E dëmtuara C., kërkon nga gjykata që drejtësia t’ua lehtësoj sa do pak dhimbjen sepse sipas saj, viktima Agonisi nuk kompensohet asnjë herë në jetë.

Më pas ajo deklaroi se nga koha e incidentit ajo vazhdonte të merrte pagën e bashkëshortit të saj, për tre vite radhazi, mirëpo dy vitet e fundit kompania “Gogaj”, më nuk u ka dhënë pagën pa ndonjë arsye.

“Jam lodh pa të drejtë nga presioni ngase çdo qytetar i Deçanit më thonë se Gogajt ta kanë siguruar jetën, por Gogajt se janë pa njërzillëk dhe se ta vrasin bashkëshortin, në një mënyrë të shantazhojnë ta dhënë rrogën dhe kur dojnë e ndalin. Edhe pse këta e kanë vra bashkëshortin por dinjitetin tim nuk mund të ma vrasin”, tha e dëmtuara C.

Një deklarim të tillë, e pohoi i akuzuari Isuf Cacaj, ku tha se lidhur me dy familjet janë duke ndodhur disa keqkuptime, dhe se po bëhen ndërhyrje të qëllimshme, ku pohoi që paga ishte ndaluar që dy vite.

“Tre kërkesa i kam pas nga familja e Agonisit që me ndërprerë pagën dhe pas asaj kohe ma kanë dërguar edhe një njëri tjetër që me vazhdu pagën, pas një periudhe që e kemi ndërpre një herë pagën ka ardhë mulla Gëzimi Hoxha, dhe na ka thënë se prapë me ndërpre rrogën se baca Isuf po thotë se po e manipuloni renë me page”, shtoi i akuzuari Cacaj.

Pas të dëmtuarës janë dëgjuar edhe 7 dëshmitarë të tjerë Zeqë Tishukaj, Labinot Pajazitaj, Shkelzen Tolaj, Granit Balaj, Zyliha Berisha, Tahir Mazrekaj dhe Riza Maha, tre këta të fundit zyrtarë policorë.

Të gjithë dëshmitarët mbetën prapa deklarimeve të dhëna në shqyrtimin e parë gjyqësor duke mos shtuar diçka tjetër.

Në fund, mbrojtësi i viktimave Luan Mehmetaj, deklaroi se meqenëse kjo çështje penale është kthyer në pikën zero në rigjykim, theksoi se nga ky moment e dëmtuara A.C, nuk pranon asnjë lloj kompensimi-page, apo çfarëdo pasurie tjetër nga pala e akuzuar dhe se në kërkesën për kompensim të dëmit do ta parashtron sipas neni 240 të KPRK-së, dhe se kjo vlen deri në përfundimin e shyqrtimit gjyqësor.

Pas kësaj, seanca sotme përfundoi dhe seanca e radhës është caktuar sipas agjendës së paraparë.

Ndryshe, më 14 tetor 2022 Gjykata Themelore në Pejë kishte shpallur aktgjykim dënues ndaj të akuzuarit Shaban Gogaj, duke e dënuar me 7 vite e 6 muaj burgim për vrasje nga pakujdesia të Agonis Tetajt.

Gjykata e Apelit më 23 mars 2023 kishte shqyrtuar ankesat e mbrojtësit të Gogajt, avokatit Besnik Berisha, palës së dëmtuar, avokatit Berat Tmava dhe ankesën e Prokurorisë Themelore në Gjilan. Kurse, pas shqyrtimit të ankesave, Apeli më 23 mars 2023 e ka kthyer lëndën në rigjykim.

Sipas aktakuzës së ngritur nga Prokuroria Themelore në Pejë, më 12 qershor 2019, Shaban Gogaj akuzohet se më 23 shtator 2018, rreth orës 11:04, në Deçan, në rrugën “Luan Haradinaj”, përkatësisht në kompaninë “Gogaj AG”, me dashje e privon nga jeta Agonis Tetaj dhe me këtë ka vënë në rrezik edhe jetën e të dëmtuarve Agzon Hadërgjonaj dhe Faruk Zukaj. Në këtë rast, për armëmbajtje pa leje akuzohet edhe Isuf Cacaj, ku sipas aktakuzës, në dyqanin “Gogaj AG”, ka mbajt në pronësi armën, e gjetur nga policia në sirtarët nën banakun e arkës.

Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +383 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë