Mbi një shekull jetë: Personi më i vjetër në botë mbush 117 vjeç

Personi më i vjetër në botë, sipas të dhënave të Guinness World Records, mbushi 117 vjeç të premten e kaluar. Ethel Caterham ka lindur në Mbretërinë e Bashkuar më 21 gusht 1909, në një kohë kur në fronin britanik ishte stërgjyshi i stër-stërgjyshit të mbretit aktual.

Ethel ishte e shtata nga tetë fëmijët dhe thotë se jetëgjatësinë e saj ia atribuon një qasjeje “jo konfrontuese” ndaj jetës – duke shmangur debatet, por pa bërë gjithmonë kompromise. Për ditëlindjen e saj, ajo falënderoi të gjithë për urimet dhe tha se edhe në moshën 117-vjeçare ka përjetuar shumë gjëra për herë të parë, përfshirë përkëdheljen e një llambe dhe mbajtjen për dore të mbretit Charles III.

Caterham ka jetuar 50 vite më gjatë se bashkëshorti i saj, Norman, si dhe ka humbur dy vajzat e saj. Sot ajo jeton nën kujdesin dhe shoqërinë e tre nipërve dhe pesë stërnipërve. Në rininë e saj, Ethel ishte e apasionuar pas udhëtimeve dhe punoi si dado për një familje britanike në Indi, ku kaloi tre vite duke eksploruar vendin dhe takoi bashkëshortin e saj, major në ushtrinë britanike.

Ethel Caterham u bë personi më i vjetër i gjallë në botë pas vdekjes së murgeshës braziliane Inah Canabarro Lucas, e cila ndërroi jetë në moshën 116-vjeçare. Tashmë, në moshën 117-vjeçare, Ethel vazhdon të jetë një nga njerëzit më jetëgjatë të dokumentuar në historinë moderne.