Mbi 25 vajza dhe gra filluan trajnim në sektorin e tekstilit

Mbi 25 vajza dhe gra të reja sot kanë filluar trajnimin në sektorin e tekstilit, në Qendrën për Aftësime Profesionale.

Ministri i Punës dhe Mirëqenies  Sociale, Arban Abrashi, vizitoi sot këtë qendër, thuhet në  njoftim përmes faqes zyrtare të Ministrisë së Punës dhe Mirqenies Sociale.

Për trajnimin e kandidatëve në sektorin e tekstilit kjo qendër  është pajisur me makinerinë e nevojshme, donacion ky në kuadër të bashkëpunimit të Ministrisë dhe Komunës së Bursës.

“Fillimisht ky trajnim i ndihmuar nga MPMS dhe Komuna e Bursës, do të përgatisë profesionalisht vajza dhe gra në fushën e tekstilit dhe tanimë ky projekt është iniciuar dhe trajnimi po zhvillohet në dy ndërrime”, ka thënë Abrashi.

Gjitashtu në njoftim thuhet se Abrashi ka thënë se Memorandumi i Bashkëpunimit që ka filluar të jetësohet, është shumë i mirëseardhur, pasi që në këtë mënyrë përveç trajnimit po bëhet edhe shkëmbimi i përvojave në aftësimet profesionale, kusht i domosdoshëm për zhvillimin ekonomik të vendit.

Në jetësimin e këtij bashkëpunimi, Ministri ka falënderuar edhe shoqatën kulturore ‘Kosova – Shkupi’, në Bursa të Turqisë.