Lavrov: Moska e di çka ka në Nish, por s’e di ç’ka në Bondsteel

Shefi i diplomacisë ruse Sergei Lavrov sonte në Beograd ka thënë se “Qendra humanitare serbo –ruse në Nish punon vetëm në kuadër të mandatit humanitar, por nuk është qartë se çfarë bëjnë kolegët tanë në bazën Bondsteel”, njofton Tanjug.

Ai ka shtuar se gjoja përfaqësuesit e SHBA-së janë ftuar në Nish për të parë çfarë po bëhet në këtë qendër.

Nga Beogradi nuk njoftohet nëse ndërmjet Lavrovit e zyrtarëve serbë të jetë biseduar për imunitetin diplomatik të personelit të kësaj qendre që e kërkon Moska e që kundërshton Washingtoni.

Në një intervistë për Agjencinë e lajmeve, Beta, Lavrov ka thënë se “Krahina Autonome e Kosovës është pjesë e pandashme e Serbisë”

“Prandaj ne, në çështjen e Kosovës, jo që e mbështesim shumë Serbinë, sa e mbështesim vendimin e organit më të lartë ndërkombëtar që përgjigjet për problemet e paqes dhe sigurisë ndërkombëtare. Rezolutën 1244 nuk e ka zhbërë askush dhe nga ky fakt duhet të nisemi. Ne pajtohemi me atë që BE ka marrë përsipër mbi vetë rolin e ndërmjetësit në dialogun mes Beogradit e Prishtinës. Vlerësoj se ky dialog është i domosdoshëm, dhe se baza e tij duhet të jetë Rezoluta 1244”.