Kosova ta krijojë shërbimin e jashtëm të inteligjencës

Njohësi i çështjeve të sigurisë, Behar Selimi, ka bërë me dije se treni ilegal serb nuk do të jetë provokimi i fundit i Serbisë ndaj shtetit të Kosovës.

Sipas tij, Serbia do të vazhdojë të provokojë edhe më seriozisht në të ardhmen. Në këtë intervistë dhënë për gazetën “Epoka e re”, Selimi ka thënë se Serbia me veprime të tilla po tenton ta destabilizojë veriun e vendit. Ish-komandanti i Policisë së Kosovës i ka porositur institucionet e vendit të investojnë më shumë në Agjencinë e Kosovës për Inteligjencë (AKI) që të jetë një prej shërbimeve më profesionale në rajon. Selimi ka bërë thirrje që Kosova ta krijojë edhe shërbimin e jashtëm të inteligjencës. Ai e ka hedhur poshtë mundësinë që Serbia me këto veprime të mund ta aneksojë pjesën e veriut. “Nuk kam drojë nga aneksimi i territorit, por kam drojë, madje shumë, nga tendencat autonomiste”, është shprehur Selimi. /gazetametro.net.