Konjufca i kundërpërgjigjet Escobarit: ‘Nëse presidentja e kryeministri nuk e nënshkruajnë Asociacionin, nuk ka fuqi që e krijon’
-
09/02/2023 | 07:42
Kryeparlamentari i Kosovës, Glauk Konjufca, i është kundërpërgjigj të dërguarit amerikan për Ballkanin Perëndimor, Gabriel Escobar, duke thënë se nëse presidentja e kryeministri nuk e nënshkruajnë Asociacionin, nuk ka fuqi që e krijon atë, shkruan Gazeta Metro.
Escobar ditë më parë tha se nuk ka shumë rëndësi nëse Kurti e pranon apo jo Asociacionin, pasi që e njëjta nuk është marrëveshje mes tij dhe Serbisë, por është mes Serbisë dhe Kosovës.
“Sido që të shkoni përpara nën patronazhin e dialogut të lehtësuar nga BE-ja, do të keni një Asociacion [të komunave me shumicë serbe]. Prandaj them gjithmonë se do të zbatohet në një moment. Pranon apo jo obligimin ligjor qeveria aktuale në Kosovë nuk është marrëveshje mes Kurtit dhe Serbisë. Është një marrëveshje mes Serbisë dhe Kosovës. Kjo është arsyeja pse unë vazhdoj të them se do të ndodhë. Do të jetë baza e marrëveshjes së normalizimit. Nuk ka asgjë për ta bërë këtë”, shtoi Escobar.
I pyetur për këtë deklaratë, Konjufca ka thënë se pa presidenten dhe kryeministrin, nuk mund të krijohet Asociacioni.
“Nëse presidentja e kryeministri nuk e nënshkruajnë Asociacionin, nuk ka fuqi që e krijon”, tha ai në T7.
“Jo fuqi kështu forcë. Por asnjë fuqi demokratike e politike”, shtoi Konjufca./gazetametro.net
