Kina kthen Kosovën në Këshillin e Sigurimit të OKB-së

Këshilli i Sigurimit i Kombeve të Bashkuara sërish do të diskutojë për Republikën e Kosovës në mbledhjen e radhës në nëntor, gjatë kryesimit të ‘qeverisë botërore’ nga Kina, transmeton gazetametro.net.

Sipas gazetës beogradase “Novosti”, për dallim nga Britania e Madhe dhe SHBA-të që kishin hequr nga rendi i ditës diskutimet mbi raportin e sekretarit të përgjithshëm të OKB-së Antonio Guterres për situatën në Kosovë, Kina ka vepruar ndryshe dhe e ka rikthyer këtë raport në agjendë të mbledhjes së radhës.

Në shqyrtim do të jetë raporti i cili ka të bëjë me periudhën 16 prill deri më 15 korrik 2018, si edhe ai për zhvillimet nga korriku deri në mes të tetorit.

Kina me këtë rast mban anën e Serbisë, e cila ka dëshirë që për Kosovën ende të vlejë rezoluta 1244, përkatësisht sikur Kosova nuk e ka të zgjidhur ende statusin e saj dhe është nën administrimin dhe temë e OKB-së. Amerikanët e britanikët, ndërkaq, kanë deklaruar se gjendja në Kosovë nuk paraqet rrezik për sigurinë rajonale si dhe se ajo tashmë është çështje e Bashkimit Evropian, ku edhe synon të anëtarësohet./gazetametro.net