Jordan Peterson: Politikat klimatike janë shndërruar në një betejë ideologjike

Profesori dhe autori Jordan B. Peterson kritikoi mënyrën se si është zhvilluar debati për ndryshimet klimatike gjatë dy dekadave të fundit, duke e lidhur kthesën kryesore me dokumentarin “An Inconvenient Truth” të Al Gore, i publikuar në vitin 2006.

Në një analizë të tij, Peterson argumenton se shqetësimet mjedisore janë shndërruar në një çështje të fortë politike dhe se disa parashikime katastrofike për klimën nuk janë realizuar në përmasat e paralajmëruara.

Ai kundërshton përdorimin e frikës si mjet politik dhe kritikon politikat që, sipas tij, rrisin ndërhyrjen e shtetit në jetën e përditshme të qytetarëve.

Peterson thekson se rritja e përqendrimit të CO₂ ka qenë objekt i debateve shkencore dhe se ndikimi i saj duhet të shqyrtohet përtej përplasjeve ideologjike. Ai përmend gjithashtu studime që kanë raportuar rritje të gjelbërimit global dhe përparim në prodhimin bujqësor, duke argumentuar se disa parashikime të mëhershme për krizë ushqimore apo shkretëtirëzim masiv nuk janë materializuar.

Në analizën e tij, Peterson kritikon edhe shpenzimet e mëdha për tranzicionin energjetik, duke thënë se investimet mund të ishin orientuar më shumë drejt teknologjive si energjia bërthamore dhe zhvillimi i infrastrukturës energjetike.

Ai argumenton se një qasje më pragmatike ndaj energjisë do të mund të ulte emetimet dhe njëkohësisht të ndihmonte zhvillimin ekonomik, veçanërisht në vendet më të varfra.