Japonia përballë turizmit masiv: Ashpërson masat, gjobit turistët që hedhin mbeturina

Ndërsa Japonia po regjistron numër rekord vizitorësh nga jashtë, autoritetet në Tokio kanë ashpërsuar masat ndaj sjelljeve që dëmtojnë hapësirat publike, veçanërisht në zonën e njohur Shibuya.

Në këtë lagje të frekuentuar, hedhja e mbeturinave në rrugë tashmë ndëshkohet me gjobë të menjëhershme prej rreth 2,000 jenësh, si pjesë e përpjekjeve për të frenuar problemet e shkaktuara nga fluksi i madh i turistëve, përfshirë edhe konsumimin e alkoolit në ambiente publike dhe mbingarkesën në hapësira urbane.

Autoritetet lokale kanë intensifikuar praninë në terren me ekipe inspektimi që patrullojnë zonat më të vizituara, ndërsa është lansuar edhe një fushatë ndërgjegjësuese me mesazhin paralajmërues “nëse hedh mbeturina, humbet para”, që synon të rrisë disiplinën e vizitorëve.

Rritja e turizmit në Japoni pas pandemisë, e ndikuar edhe nga zhvlerësimi i monedhës vendase dhe përhapja e përmbajtjeve virale në rrjete sociale, ka sjellë sfida të reja për menaxhimin e turizmit masiv, duke shtyrë qeverinë të shqyrtojë masa shtesë si taksa të reja dhe sisteme për kontrollin e turmave në zonat më të frekuentuara.