Incident i rëndë në New York: Pesë persona të lënduar pas sulmit me thikë

Pesë persona kanë mbetur të lënduar pas një incidenti të dhunshëm me thikë në stacionin “Penn Station” në New York City, kanë bërë të ditur autoritetet lokale, transmeton Gazeta Metro.

Sipas shërbimeve emergjente të qytetit, një prej viktimave ndodhet në gjendje të rëndë, dy të tjerë kanë pësuar dëmtime mesatare, ndërsa pjesa tjetër e të lënduarve janë në gjendje më stabile.

Policia e New Yorkut ka ndaluar të dyshuarin pas një ndjekjeje që pasoi menjëherë ngjarjen, e cila raportohet se ka ndodhur rreth orës 19:00 sipas kohës lokale.

Sipas mediave amerikane, përfshirë CBS News dhe ABC News, ngjarja dyshohet të jetë një shpërthim i rastësishëm dhune, ndërsa i arrestuari thuhet se ka shfaqur gjendje të paqëndrueshme emocionale dhe është ndaluar nga autoritetet hekurudhore Amtrak. Të plagosurit janë dërguar në spitalin Bellevue për trajtim.