Humbën kontaktet në një zonë malore në Shqipëri, gjenden pas dy ditësh dy turistët gjermanë

Dy turistë nga Gjermania, të cilët ishin raportuar të humbur në një zonë malore në Shqipëri, janë gjetur të martën në gjendje të mirë shëndetësore pas një operacioni kërkimor që zgjati rreth 27 orë, transmeton Gazeta Metro.

Autoritetet shqiptare nisën kërkimet pasi humbën gjurmët e tyre në malet e Polisit. Sipas informacioneve paraprake, automjeti me të cilin po udhëtonin kishte pësuar avari në një rrugë të izoluar pranë zonës së Sopotit.

Për shkak të mungesës së rrjetit telefonik, ata nuk kishin mundësi të kontaktonin me familjarët apo institucionet përkatëse.

Pas kërkimeve në terren të vështirë, turistët u lokalizuan në zonën e Stravajt dhe, sipas autoriteteve, nuk kishin nevojë për trajtim mjekësor./gazetametro.net