Hoxha në SHBA merr mbështetje për reformat në drejtësi

Ministrja e Drejtësisë e Republikës së Kosovës, Dhurata Hoxha ka marrë mbështetje nga Departamenti Amerikan i Drejtësisë për reformat e ndërmarra në Ministrinë e Drejtësisë dhe në sistemin e drejtësisë në Kosovë, njofton kumtesa ministrore.

Gjatë vizitës, me ftesë nga Departamenti Amerikan i Drejtësisë, Hoxha të martën, në Washington, është takuar me Bruce Swartz nga Departamenti i Drejtësisë së SHBA-së, përgjegjës për bashkëpunim ndërkombëtar për zyrat OPDAT, ICITAP, INL, të cilat mbështesin Republikën e Kosovës.

Në këtë takim, Hoxha dhe Bruce Swartz nga Departamenti i Drejtësisë së SHBA-së, kanë diskutuar për përkrahjen amerikane për sundimin e ligjit në Kosovë.

Sipas kumtesës, ministrja Hoxha mori mbështetje të Departamentit të Drejtësisë së SHBA-së edhe për fuqizimin e legjislacionit për sistemin e drejtësisë, për të fuqizuar edhe më shumë llogaridhënien dhe transparencën e institucioneve të drejtësisë.