Haradinaj sot del para prokurorit francez

Ish-kryeministri i Kosovës Ramush Haradinaj u arrestua të mërkurën në aeroportin e Basel-Mulhouse-Freiburg në Francë, në bazë të një fletëarresti ndërkombëtar të lëshuar nga Serbia, për krime lufte të pretenduara se janë kryer gjatë luftës së viteve 1998-1999.

Mediat franceze rapotojnë duke u thirrur në burime gjyqësore, se ish kryeministri kosovar po mbahet i ndaluar dhe do të paraqitet të enjten para Prokurorit të Përgjithshëm në gjykatën e qytetit Colmar, transmeton gazetametro.net.

Aty do të shqyrtohet edhe kërkesa e Serbisë për ekstradim të Haradinajt.

Urdhër arresti ndërkombëtar ndaj Haradinajt është lëshuar në vitin 2004 nga ana e Serbisë. Haradianj është gjykuar dy herë për krime lufte, dhe është liruar si i pafajshëm nga gjykata e OKB’së në Hagë.

Mediat franceze raportojnë se dhoma hetuese e gjykatës atje, do të duhet të verifikojë nëse aktet për të cilat ekziston urdhër arresti nuk janë gjykuar më parë, dhe në veçanti nëse kërkesa e ekstradimit është bërë për arsye politike. /gazetametro.net