Hamza: Kosova po mbahet peng nga kalkulimet e pushtetit

Kreu i PDK-së, Bedri Hamza, doli me një qëndrim të prerë pas mbledhjes së Këshillit Drejtues të partisë, duke drejtuar ‘gishtin’ nga mazhoranca për gjendjen e rëndë në vend, transmeton Gazeta Metro.

Sipas tij, Kosova është futur në një cikël krizash që nuk po mbarojnë, e për këtë fajtorin kryesor e sheh te shumica parlamentare dhe mënyra se si po e menaxhojnë situatën.

Hamza theksoi se PDK nuk do të bëhet pjesë e skenarëve që dëmtojnë funksionimin e shtetit, duke kërkuar që të ndalet praktika e vendosjes së interesave të ngushta mbi ato të qytetarëve. Ai u shpreh se situatat e momentit po i kushtojnë shumë vendit në këtë periudhë të ndjeshme.

“Partia Demokratike e Kosovës thekson se vendi nuk duhet të mbahet peng nga kalkulimet politike dhe interesat e ngushta partiake”, deklaroi Hamza./gazetametro.net