Orkestra dhe Kori i Filharmonisë së Kosovës janë pritur me duartrokitje të gjata nga publiku polak, pas një koncerti të suksesshëm në skenën e Filharmonisë së Krakovit, nën drejtimin e dirigjentit Wojciech Czepiel.
Koncerti u realizua në bashkëpunim me Filharmoninë e Krakovit dhe Institutin e Dialogut Ndërkulturor “Papa Gjon Pali II” në Krakov, duke shënuar një tjetër pikë të rëndësishme në bashkëpunimin kulturor ndërmjet Kosovës dhe Polonisë.
Në këtë mbrëmje muzikore u paraqitën edhe solistët Joanna Konarzewska në violinë, Adelina Pajoja në soprano, Ivana Hoxha në mezzosoprano, Piotr Kalina në tenor dhe Arkadiusz Jakus në bas-bariton, të cilët së bashku me orkestrën, korin dhe dirigjentin u vlerësuan nga publiku për interpretimin e tyre.
Programi ndërthuri trashëgiminë muzikore polake me krijimtarinë e kompozitorëve shqiptarë nga Kosova. Mbrëmja u hap me “Ciaccona” nga “Requiemi polak” i Krzysztof Pendereckit, vepër e shkruar si homazh për Papa Gjon Palin II. Në vijim u interpretua poema simfonike “Skënderbeu” e kompozitorit kosovar Fahri Beqiri, e cila ndërthur traditën muzikore perëndimore me elemente të kulturës kombëtare shqiptare.
Pjesë e programit ishte edhe “Koncerti për violinë nr. 1” i Karol Szymanowskit, një nga veprat e rëndësishme të repertorit koncertant polak, si dhe “Homagium Matri Teresiae” e kompozitorit kosovar Mendi Mengjiqi, kushtuar Nënë Terezës.
Kjo vepër, e interpretuar për herë të parë në Krakov më 1999, po ashtu nën drejtimin e Wojciech Czepielit, u rikthye në skenë si një pikëtakim artistik mes identitetit kulturor të Kosovës dhe trashëgimisë së Nënë Terezës.
Koncerti dëshmoi potencialin e muzikës për të afruar kultura të ndryshme dhe për të krijuar ura bashkëpunimi mes artistëve e publikut, duke prezantuar krijimtarinë muzikore të Kosovës në një skenë të rëndësishme ndërkombëtare