Fati i pjesëtarit të FSK’së: Iu hodh bomba në oborr, por nuk shpërtheu
-
28/10/2018 | 18:06
Ora 03:00 e mëngjesit të sotëm ka mundur të përfundojë tragjikisht për familjen e një pjesëtari boshnjak të Forcës së Sigurisë së Kosovës.
Kjo pasi, me anë të një mjeti shpërthyes, dikush u mundua ta frikësojë një pjesëtar të FSK-së. Këtë ngjarje për Metron e ka konfirmuar zëdhënësi i FSK, Ibrahim Shala.
Ndërkohë, nga burime të Policisë në veri, gazeta merr vesh se bomba ishte hedhur në lëvizje e sipër, por për fatin e mirë të kësaj familje, nuk kishte shpërthyer.
Burimet i kanë thënë Metros se ngjarja ka ndodhur në rrugën “Bosanska”, në veri të Mitrovicës. Mësohet se në shtëpinë e targetuar ka jetuar një familje me mbiemrin Loxha.
Sidoqoftë, deri tash nuk ka asnjë person të dyshuar, mirëpo Policia është në ndjekje të një grupi që dyshohet për vepra të ngjashme në veri të vendit.
Ndryshe, sulmet ndaj pjesëtarëve të FSK’së që vijnë nga komunitetet nuk janë të rralla në veri. Hiç më larg se para disa muajsh u sulmuan shtëpitë e disa serbëve./gazetametro.net
