Dështoi me LDK’në, PDK-Kurtit: Njeh vetëm kapjen e pushtetit, s’i dhamë kënaqësinë të bëjë filma me emra

Pasi Albin Kurti nuk arriti të merrej vesh me LDK-në, ai e ka kthyer shikimin nga partia e Bedri Hamzës për të gjetur një zgjidhje për postin e presidentit, transmeton Gazeta Metro.

Mirëpo, deputeti Arben Mustafa reagoi menjëherë duke thënë se PDK-ja e ka kuptuar që moti se ku rrah çekani i kryeministrit. Sipas tij, Kurti nuk po kërkon bashkëpunim, por vetëm po tenton të marrë çdo institucion në dorë.

“PDK e ka kuptuar me kohë lojën e Albin Kurtit. Ky njeri nuk njeh tjetër logjikë, përveç kapjes së të gjitha pushteteve”, shkroi Mustafa.

Ai shtoi se partia e tij nuk ka dashur të hyjë në lojërat e kryeministrit dhe as të merret me propozime emrash sa për të kaluar radhën. Sipas Mustafës, qëllimi i Kurtit është vetëm të sundojë dhe jo të punojë për të mirën e vendit.

“Ai nuk është në politikë për të ndërtuar, por vetëm për të marrë sa më tepër pushtet dhe për të sunduar. Prandaj, nuk i dhamë kënaqësinë që të luajë me emra për president dhe të bëjë filma”, deklaroi Mustafa./gazetametro.net