Kryetari i Lidhjes Demokratike të Kosovës (LDK), Lumir Abdixhiku, më në fund ka dalur me një reagim për zhvillimet e fundit me ambasadorin e Kosovës në Kroaci, në lidhje me raportimin për përfshirjen në një skandal në Slloveni, shkruan Gazeta Metro.
Abdixhiku në një shkrim në Facebook, për shpërthimin e skandalit të ambasadorit Martin Berishaj, ka thënë se është arsyeja e vërtetë e rezistencës së pushtetit ndaj formimit të Komisionit Hetimor në Kuvend.
“Asnjë arsyetim refuzues i tyre nuk kishte kuptim. As arsyetimi i luftës në Ukrainë, prandaj – merreni me mend – s’duhej të bëhej ky hetim; as preteksti i ligjshmërisë së nënshkrimeve nuk kishin kuptim. Vetëm një hall i madh prodhonte arsyetime të pashpresa si këto. Por sa më i zëshëm refuzimi i tyre, aq më i domosdoshëm bëhej insistimi ynë. Sot, hetimi parlamentar nuk ka alternativë. Ky skandal, dhe të tjera skandale të renditura në shpenzimin e plot 120 milionë eurove edhe shtrenjtimin e faturave deri në 100%, duhet të gjejnë dritë. Kriza energjetike është një piramidë keqmenaxhimi, neglizhence e tani dhe krimi. Këtë piramidë duhet dhe do ta shembim tē gjithë”, ka thënë ai.
Tutje Abdixhiku ka thënë se bojkoti i LDK’së në Kuvend, nuk merr fund pa formimin e Komisionit Hetimor për Energji.
“Sepse s’ka ligj, s’ka temë e s’ka çështje tjetër më me rëndësi se sa kjo me energji. Do ta zbardhim të vërtetën herët apo vonë. Deri atëherë, tërheqja e menjëhershme e ambasadorit të komprometuar tani, formimi i Komisionit Hetimor, e shkarkimi i Bordit të Rregullatorit – që ende refuzon vendimin e Gjykatës rreth tarifave – janë hapa të parë në këtë drejtim”. ka shkruar në fund kryetari i LDK’së. /gazetametro.net