Blinken thirrje Kurtit e Vucicit nga Norvegjia: Veproni me përgjegjësi, ecni përpara

Sekretari Amerikan Antony Blinken në një konferencë për media në Oslo pas një takimi me shefat e diplomacisë së vendeve anëtare të NATO-s, i ka kushtuar vëmendje zhvillimeve në Kosovë. Blinken ka thënë se veprimet e marra së fundi çojnë Kosovën dhe Serbinë në drejtim të gabuar.

“Eskalimi atje dhe veprimet e marra i çojnë të dyja palët, Kosovën dhe Serbinë, në drejtim të gabuar,  sepse përgjigja që po kërkojmë është de-eskalimi, evitimi i veprimeve të njëanshme dhe kthimi në procesin e normalizimit të udhëhequra nga BE. Kjo është ajo që u premton të dyja palëve integrim në strukturat euroatlantike në të ardhmen”, ka thënë Sekretari Blinken.

Ai tutje ka shtuar se SHBA-ja ka qenë e qartë në shprehjen e shqetësimit të saj për veprimet që janë marrë dhe se brengat ia kanë paraqitur liderëve të përfshirë në këtë situatë, përfshirë kryeministrin Albin Kurti.

Shefi i diplomacisë amerikane ka thënë se presin që palët të veprojnë me përgjegjësi dhe të ecet përpara.

“Kemi qenë shumë të qartë në brengat tona për veprimet që janë ndërmarrë së fundi. Ua kemi thënë këtë direkt liderëve të involvuar, përfshirë kryeministrit Kurti.  Presim nga të dy që të veprojnë me përgjegjësi dhe të ecin përpara”, ka thënë Blinken.

Përndryshe, Sekretari amerikan i Shtetit, Anthony Blinken, ditë më parë, më saktësisht të premten e kaluar ka reaguar ashpër duke dënuar aksionin e Policisë së Kosovës në veri.

Në reagimin e tij Blinken i ka bërë thirrje Kurtit të ndalojë menjëherë veprimet që ai i ka quajtur “masa të dhunshme” dhe të ripërqendrohet në dialog.

Shtetet e Bashkuara të Amerikës dënuan të premten veprimet e Qeverisë së Kosovës “për të hyrë me forcë në ndërtesat e komunave në veri të Kosovës”.

Me anë të një deklarate, Blinken u shpreh se kjo qeveri i ndërmori këto veprime në kundërshtim me këshillat e Shteteve të Bashkuara dhe partnerëve evropianë të Kosovës.

“Këto veprime kanë përshkallëzuar në mënyrë të mprehtë dhe të panevojshme tensionet, duke minuar përpjekjet tona për të ndihmuar në normalizimin e marrëdhënieve ndërmjet Kosovës dhe Serbisë dhe do të kenë pasoja për marrëdhëniet tona dypalëshe me Kosovën”, thotë deklarata.