Banorët festojnë ligjin për Obiliqin

Banorët e Obiliqit kanë dalur rrugëve për të festuar miratimin e ligjit të ri për Obiliqin.

Kjo sepse sipas këtij ligji, 20 për qind e inkasimit iu ndahen qytetarëve të kësaj zone.

Kjo komunë do të gëzojë trajtim të veçantë ligjor dhe banorët për shkak të dëmeve nga eksploatimi do të përfitojnë edhe financiarisht si kompensim. Me këtë projektligj është krijuar baza juridike që banorët përveç tjerash t’i gëzojnë edhe disa të mira të domosdoshme për ta në formë të kompensimit për dëmin që u shkaktohet atyre nga ndotja e ambientit.

Sipas memorandumit shpjegues, qëllimi i këtij projektligji është përcaktimi i zonës së Obiliqit dhe rreth tij si zonë me status të veçantë mjedisor, pastaj përcaktimi i masave adekuate për krijimin e kushteve për një jetë më cilësore dhe më dinjitoze për banorët e kësaj zone të rrezikuar.

Neni 9 i këtij projektligji sqarohet pjesa e mjeteve financiare të kushtuara për Zonën e Veçantë, për të cilin qeveria do të ndajë një grant të përhershëm, i cili do të menaxhohet nga komuna e Obiliqit dhe ministria e Financave.

Gjithashtu, me këtë ligj obligohet edhe ministria e Shëndetësisë të krijojë shërbime shtesë në këtë zonë. Ndërsa, banorëve të kësaj zone do t’iu ofrohet edhe energji elektrike me një kuotë më të ulët./gazetametro.net