Arbeloa për gjasat e Real Madrid: Më e lehtë ta fitojë Champions sesa La Liga

Real Madrid hyn në shtatë ndeshjet e fundit të sezonit me pak objektiva reale, duke pasur parasysh diferencën prej nëntë pikësh ndaj Barcelonës në garën për titullin e La Liga.

Megjithatë, ekziston dëshira për ta mbyllur sezonin sa më fort, edhe nëse kjo nënkupton mbetje pa trofe.

“Los Blancos” kanë dështuar të fitojnë 6 nga 7 trofetë e fundit të mëdhenj në dispozicion, dhe kjo mund të bëhet 7 nga 7 nëse nuk arrijnë të kapin Barcelonën deri në fund të sezonit.

Sipas “Mundo Deportivo”, trajneri Álvaro Arbeloa foli për arsyet pse gjërat nuk kanë shkuar mirë këtë sezon.

“Dy sezone pa fituar asgjë, mendoj se hera e fundit që ka ndodhur ishte para 20 vitesh. Real Madridi është klubi ku gjërat shkojnë më shpesh mirë. Ka momente kur nuk funksionojnë, por mentaliteti i këtij klubi është gjithmonë të shohë nga e ardhmja. Te Real Madridi nuk vlen të qëndrosh te humbjet, por as te fitoret, sepse e dimë kërkesën e këtij klubi dhe gjithmonë duhet të shohësh përpara për të fituar. Duhet t’i fitojmë shtatë ndeshjet e mbetura”, tha ai.

Arbeloa u pyet edhe për vështirësitë në garat vendase në vitet e fundit, me pak tituj në La Liga dhe Copa del Rey krahasuar me pritshmëritë.

Ai theksoi se dinamika e garës e bën më të lehtë për Real Madridin të ketë sukses në Evropë sesa në Spanjë.

“Do të gjenim një zgjidhje, dhe është e lehtë për shumëkënd ta shohë kështu. Në raport me performancën tonë, jam i sigurt se kemi hapësirë për përmirësim në La Liga këto vite. Këta muaj mendoj se kemi luajtur më mirë në ndeshjet e mëdha sesa kundër skuadrave më të vogla. Nëse flasim për këta tre muaj, kemi shumë hapësirë për përmirësim. Por kemi përjetuar edhe situata, si ajo kundër Gironës, që e bëjnë më të lehtë për Real Madridin të fitojë një Champions sesa një La Liga”.

I pyetur sërish për të ardhmen e tij, Arbeloa foli edhe për marrëdhënien me dhomën e zhveshjes, që duket më e mirë krahasuar me paraardhësin Xabi Alonso.

Ai hodhi poshtë sugjerimet se nuk ka qenë mjaftueshëm kërkues me lojtarët.

“Nuk kam ndjesinë e një marrëdhënieje ‘shokësh’. Mendoj se kam pasur një raport të mirë me lojtarët. Nuk e kuptoj futbollin ndryshe. Kjo nuk do të thotë që nuk je kërkues apo që nuk i shtyn ata në maksimum. Është një marrëdhënie që duhet ta pranosh kur je lojtar. Edhe në momentet e vështira ka pasur gjithmonë atmosferë të mirë në dhomën e zhveshjes. Për mua ka qenë e suksesshme dhe ashtu siç duhet të jetë një skuadër”, e mbylli ai.